Framvinda, umfang og forsendur
Grænásbraut 506 hýsti áður verkfræðistofur varnarliðsins og almenna viðhaldsþjónustu hersins. Húsnæðið er í heild 3.300m² á tveim hæðum og skiptist það í kennslu- og fyrirlestrarými, fundaraðstöðu, skrifstofu- og smiðjuaðstöðu fyrir frumkvöðlafyrirtæki. Miklar endurbætur hafa staðið yfir á húsnæði Eldeyjar til að tryggja að frumkvöðlasetrið geti boðið upp á bestu mögulegu aðstöðu fyrir frumkvöðla til að stíga sín fyrstu skref, þróa viðskiptahugmyndir sínar og koma sprotafyrirtækjum á legg. Umbreytingin sem OMR hannaði og hafði verkumjón með náði til endurbóta á 2. hæð hússins haustið 2010 og á neðri hæð var það fjölnotasalurinn Svanurinn og smiðjurýmin vorið 2011.

Efri hæðin var í frekar slæmu ástandi og mikið völundarhús, með mörgum gluggalausum rýmum. Ennfremur var mikið um draugalagnir sem þurfti að fjarlægja. 

Helstu atriði, þar sem annaðhvort endurnýting eða sérstök hagræðing náðist í þessu verkefni, voru sem hér segir:

• Öll efri hæðin var opnuð en skipulag á lögnum og snyrtingum miðaði við að raska sem minnstu og öll skilrúm og innréttingar voru endurnýtt.
  
• Rýmin voru endurskilgreind að mestu leyti og tryggt að allt rými hefði aðgang að náttúrulegri loftræsingu og dagbirtu.
  
• Raflagnafæðingar og lampastæði voru endurnotuð þar sem því varð við komið og það uppfyllti reglugerðir.
  
• Kerfisloft voru endurnotuð og endurbætt í húsnæðinu vegna þess að lampastæði voru endurnotuð í öllum rýmum.
  
• Loftræstikerfi var einfaldað og lagfært þar sem það var til staðar.
  
• Tveir gamlir símaklefar, sem voru til staðar í öðru húsnæði og átti að farga, voru endurnýttir sem litlir gsm-símaklefar í þessu opna rými og setja skemmtilegan svip á hæðina.
  
• Þó nokkuð af hurðum var tekið til hliðar (verður geymt á lager) sem ekki var notað var í verkefninu og verður notað í önnur verkefni.
  
• Skipta þurfti út öllum gólfefnum vegna þess að styrkja þurfti undirstöður í gólfinu og sett var ódýrt, snyrtilegt plastparket á alla hæðina.
  
• Allt aðgengi upp á hæðina var opnað, og hannað og smíðað á staðnum ódýrt og fallegt handrið.
  
• Allir veggir og klæðingar voru endurnýttir og lagfærðir með viðgerðum og málaðir.
  

Smiðjurými,  hæðin var í frekar slæmu ástandi og mikið af gluggalausum rýmum. 

Helstu atriði í Svaninum og Smiðjurými, þar sem annaðhvort endurnýting eða sérstök hagræðing náðist í þessu verkefni, voru sem hér segir:

• Rýmin voru opnuð og skilgreind upp á nýtt og veggir og loft sem voru fjarlægð voru endurnýtt í nýtt skipulag.
  
• Loftræstikerfi var einfaldað og lagfært þar sem það var til staðar.
  
• Skipta þurfti út öllum gólfefnum og sett var ódýrt epoxy gólf á smiðjurými og steinteppi á gólf í Svaninum.
  
• Allt aðgengi upp á hæðina var opnað og hannað og smíðað á staðnum ódýrt og fallegt handrið.
  
• Veggir og klæðingar voru endurnýttir og lagfærðir með viðgerðum og málaðir.